Sugriva recognizes good news

ततो मूर्ध्ना निपतितं वानरं वानरर्षभः ।

tato mūrdhnā nipatitaṃ vānaraṃ vānararṣabhaḥ |

Seeing the vanara fallen with his head at his feet,

दृष्ट्वैवोद्विग्नहृदयो वाक्यमेतदुवाच ह ॥

dṛṣṭvaivodvignahṛdayo vākyametaduvāca ha ||

the foremost vanara king grew concerned and spoke.

उत्तिष्ठोत्तिष्ठ कस्मात् त्वं पादयोः पतितो मम ।

uttiṣṭhottiṣṭha kasmāt tvaṃ pādayoḥ patito mama |

'Rise, rise! Why have you fallen at my feet?

अभयं ते प्रदास्यामि सत्यमेवाभिधीयताम् ॥

abhayaṃ te pradāsyāmi satyamevābhidhīyatām ||

I grant you protection; tell me exactly what has happened.

किं सम्भ्रमाद्धितं कृत्स्नं ब्रूहि यद् वक्तुमर्हसि ।

kiṃ sambhramāddhitaṃ kṛtsnaṃ brūhi yad vaktumarhasi |

Why this agitation? Tell everything relevant that you need to say.

कच्चिन्मधुवने स्वस्ति श्रोतुमिच्छामि वानर ॥

kaccinmadhuvane svasti śrotumicchāmi vānara ||

Is all well at Madhuvana? I wish to hear, vanara.'

स समाश्वासितस्तेन सुग्रीवेण महात्मना ।

sa samāśvāsitastena sugrīveṇa mahātmanā |

Reassured by noble Sugriva,

उत्थाय स महाप्राज्ञो वाक्यं दधिमुखोऽब्रवीत् ॥

utthāya sa mahāprājño vākyaṃ dadhimukho’bravīt ||

wise Dadhimukha rose and replied.

नैवर्क्षरजसा राजन् न त्वया न च वालिना ।

naivarkṣarajasā rājan na tvayā na ca vālinā |

'King, neither Riksharajas, nor you, nor Vali ever opened the grove to such use;

वनं निसृष्टपूर्वं ते नाशितं तत्तु वानरैः ॥

vanaṃ nisṛṣṭapūrvaṃ te nāśitaṃ tattu vānaraiḥ ||

but now your grove has been ruined by vanaras.

न्यवारयमहं सर्वान् सहैभिर्वनचारिभिः ।

nyavārayamahaṃ sarvān sahaibhirvanacāribhiḥ |

Together with these forest attendants I tried to restrain them all;

अचिन्तयित्वा मां हृष्टा भक्षयन्ति पिबन्ति च ॥

acintayitvā māṃ hṛṣṭā bhakṣayanti pibanti ca ||

disregarding me, they joyfully eat and drink.

एभिः प्रधर्षणायां च वारितं वनपालकैः ।

ebhiḥ pradharṣaṇāyāṃ ca vāritaṃ vanapālakaiḥ |

These forest guards tried to prevent their assault on the grove,

मामप्यचिन्तयन् देव भक्षयन्ति वनौकसः ॥

māmapyacintayan deva bhakṣayanti vanaukasaḥ ||

but, lord, the forest-dwellers ignore even me and continue consuming it.

शिष्टमत्रापविध्यन्ति भक्षयन्ति तथापरे ।

śiṣṭamatrāpavidhyanti bhakṣayanti tathāpare |

Some throw away what remains, while others keep eating;

निवार्यमाणास्ते सर्वे भ्रुकुटिं दर्शयन्ति हि ॥

nivāryamāṇāste sarve bhrukuṭiṃ darśayanti hi ||

whenever restrained, they all respond with angry frowns.

इमे हि संरब्धतरास्तदा तैः सम्प्रधर्षिताः ।

ime hi saṃrabdhatarāstadā taiḥ sampradharṣitāḥ |

These guards here became more agitated when they were assaulted,

निवार्यन्ते वनात् तस्मात् क्रुद्धैर्वानरपुङ्गवैः ॥

nivāryante vanāt tasmāt kruddhairvānarapuṅgavaiḥ ||

and the angry vanara leaders drove them out of the grove.

ततस्तैर्बहुभिर्वीरैर्वानरैर्वानरर्षभाः ।

tatastairbahubhirvīrairvānarairvānararṣabhāḥ |

Those many heroic vanaras, their eyes reddened with anger,

संरक्तनयनैः क्रोधाद्धरयः सम्प्रधर्षिताः ॥

saṃraktanayanaiḥ krodhāddharayaḥ sampradharṣitāḥ ||

attacked these excellent vanaras who guarded the place.

पाणिभिर्निहताः केचित् केचिज्जानुभिराहताः ।

pāṇibhirnihatāḥ kecit kecijjānubhirāhatāḥ |

Some were struck with hands, others with knees;

प्रकृष्टाश्च तदा कामं देवमार्गं च दर्शिताः ॥

prakṛṣṭāśca tadā kāmaṃ devamārgaṃ ca darśitāḥ ||

they were dragged about at will and hurled towards the sky.

एवमेते हताः शूरास्त्वयि तिष्ठति भर्तरि ।

evamete hatāḥ śūrāstvayi tiṣṭhati bhartari |

Thus these brave guards have been beaten while you remain their lord,

कृत्स्नं मधुवनं चैव प्रकामं तैश्च भक्ष्यते ॥

kṛtsnaṃ madhuvanaṃ caiva prakāmaṃ taiśca bhakṣyate ||

and the whole of Madhuvana is being freely consumed by the others.'

एवं विज्ञाप्यमानं तं सुग्रीवं वानरर्षभम् ।

evaṃ vijñāpyamānaṃ taṃ sugrīvaṃ vānararṣabham |

While this was being reported to Sugriva, foremost of vanaras,

अपृच्छत् तं महाप्राज्ञो लक्ष्मणः परवीरहा ॥

apṛcchat taṃ mahāprājño lakṣmaṇaḥ paravīrahā ||

wise Lakshmana, slayer of enemies, asked him—

किमयं वानरो राजन् वनपः प्रत्युपस्थितः ।

kimayaṃ vānaro rājan vanapaḥ pratyupasthitaḥ |

'King, why has this vanara forest guardian come here?

किं चार्थमभिनिर्दिश्य दुःखितो वाक्यमब्रवीत् ॥

kiṃ cārthamabhinirdiśya duḥkhito vākyamabravīt ||

What matter did he describe in such distress?'

एवमुक्तस्तु सुग्रीवो लक्ष्मणेन महात्मना ।

evamuktastu sugrīvo lakṣmaṇena mahātmanā |

Addressed by noble Lakshmana,

लक्ष्मणं प्रत्युवाचेदं वाक्यं वाक्यविशारदः ॥

lakṣmaṇaṃ pratyuvācedaṃ vākyaṃ vākyaviśāradaḥ ||

Sugriva, skilled in speech, replied in these words.

आर्य लक्ष्मण सम्प्राह वीरो दधिमुखः कपिः ।

ārya lakṣmaṇa samprāha vīro dadhimukhaḥ kapiḥ |

'Noble Lakshmana, the heroic vanara Dadhimukha reports

अङ्गदप्रमुखैर्वीरैर्भक्षितं मधु वानरैः ॥

aṅgadapramukhairvīrairbhakṣitaṃ madhu vānaraiḥ ||

that the brave vanaras led by Angada have consumed the honey.

नैषामकृतकार्याणामीदृशः स्याद् व्यतिक्रमः ।

naiṣāmakṛtakāryāṇāmīdṛśaḥ syād vyatikramaḥ |

They would not transgress like this with their mission unfinished.

वनं यदभिपन्नास्ते साधितं कर्म तद् ध्रुवम् ॥

vanaṃ yadabhipannāste sādhitaṃ karma tad dhruvam ||

Since they have entered the grove, their task has surely succeeded.

वारयन्तो भृशं प्राप्ताः पाला जानुभिराहताः ।

vārayanto bhṛśaṃ prāptāḥ pālā jānubhirāhatāḥ |

The guards who approached to restrain them were struck with knees,

तथा न गणितश्चायं कपिर्दधिमुखो बली ॥

tathā na gaṇitaścāyaṃ kapirdadhimukho balī ||

and even this powerful Dadhimukha was disregarded.

पतिर्मम वनस्यायमस्माभिः स्थापितः स्वयम् ।

patirmama vanasyāyamasmābhiḥ sthāpitaḥ svayam |

He is the guardian I personally appointed over my grove.

दृष्टा देवी न संदेहो न चान्येन हनूमता ॥

dṛṣṭā devī na saṃdeho na cānyena hanūmatā ||

The lady has been seen, without doubt—and by none other than Hanuman.

न ह्यन्यः साधने हेतुः कर्मणोऽस्य हनूमतः ।

na hyanyaḥ sādhane hetuḥ karmaṇo’sya hanūmataḥ |

No one else could bring this undertaking to fulfilment as Hanuman could;

कार्यसिद्धिर्हनुमति मतिश्च हरिपुङ्गवे ॥

kāryasiddhirhanumati matiśca haripuṅgave ||

success and sound judgement rest in that foremost vanara.

व्यवसायश्च वीर्यं च श्रुतं चापि प्रतिष्ठितम् ।

vyavasāyaśca vīryaṃ ca śrutaṃ cāpi pratiṣṭhitam |

Resolve, courage and learning are established in him.

जाम्बवान् यत्र नेता स्यादङ्गदश्च महाबलः ॥

jāmbavān yatra netā syādaṅgadaśca mahābalaḥ ||

Where Jambavan is guide and mighty Angada is present—

हनूमांश्चाप्यधिष्ठाता न तत्र गतिरन्यथा ।

hanūmāṃścāpyadhiṣṭhātā na tatra gatiranyathā |

and Hanuman directs the work, the outcome cannot be otherwise.

अङ्गदप्रमुखैर्वीरैर्हतं मधुवनं किल ॥

aṅgadapramukhairvīrairhataṃ madhuvanaṃ kila ||

The heroes led by Angada have indeed damaged Madhuvana—

विचित्य दक्षिणामाशामागतैर्हरिपुङ्गवैः ।

vicitya dakṣiṇāmāśāmāgatairharipuṅgavaiḥ |

those foremost vanaras returning from their search of the south.

आगतैश्चाप्रधृष्यं तद्धतं मधुवनं हि तैः ॥

āgataiścāpradhṛṣyaṃ taddhataṃ madhuvanaṃ hi taiḥ ||

On returning, they have violated that otherwise unapproachable grove.

धर्षितं च वनं कृत्स्नमुपयुक्तं तु वानरैः ।

dharṣitaṃ ca vanaṃ kṛtsnamupayuktaṃ tu vānaraiḥ |

The whole grove has been overrun and enjoyed by the vanaras,

पातिता वनपालास्ते तदा जानुभिराहताः ॥

pātitā vanapālāste tadā jānubhirāhatāḥ ||

and its guardians knocked down with blows of the knees.

एतदर्थमयं प्राप्तो वक्तुं मधुरवागिह ।

etadarthamayaṃ prāpto vaktuṃ madhuravāgiha |

This pleasant-spoken vanara, named Dadhimukha,

नाम्ना दधिमुखो नाम हरिः प्रख्यातविक्रमः ॥

nāmnā dadhimukho nāma hariḥ prakhyātavikramaḥ ||

renowned for courage, has come here to report that matter.

दृष्टा सीता महाबाहो सौमित्रे पश्य तत्त्वतः ।

dṛṣṭā sītā mahābāho saumitre paśya tattvataḥ |

Strong-armed son of Sumitra, understand clearly: Sita has been seen.

अभिगम्य यथा सर्वे पिबन्ति मधु वानराः ॥

abhigamya yathā sarve pibanti madhu vānarāḥ ||

See how all the vanaras have returned and are drinking honey!

न चाप्यदृष्ट्वा वैदेहीं विश्रुताः पुरुषर्षभ ।

na cāpyadṛṣṭvā vaidehīṃ viśrutāḥ puruṣarṣabha |

Without seeing Vaidehi, those renowned forest-dwellers

वनं दत्तवरं दिव्यं धर्षयेयुर्वनौकसः ॥

vanaṃ dattavaraṃ divyaṃ dharṣayeyurvanaukasaḥ ||

would never dare violate the divine grove protected by a boon.'

ततः प्रहृष्टो धर्मात्मा लक्ष्मणः सहराघवः ।

tataḥ prahṛṣṭo dharmātmā lakṣmaṇaḥ saharāghavaḥ |

Hearing the words pleasing to the ear from Sugriva's mouth,

श्रुत्वा कर्णसुखां वाणीं सुग्रीववदनाच्च्युताम् ॥

śrutvā karṇasukhāṃ vāṇīṃ sugrīvavadanāccyutām ||

righteous Lakshmana and Raghava became joyful.

प्राहृष्यत भृशं रामो लक्ष्मणश्च महायशाः ।

prāhṛṣyata bhṛśaṃ rāmo lakṣmaṇaśca mahāyaśāḥ |

Rama and illustrious Lakshmana were deeply delighted.

श्रुत्वा दधिमुखस्यैवं सुग्रीवस्तु प्रहृष्य च ॥

śrutvā dadhimukhasyaivaṃ sugrīvastu prahṛṣya ca ||

Having heard Dadhimukha's account, Sugriva too rejoiced—

वनपालं पुनर्वाक्यं सुग्रीवः प्रत्यभाषत ।

vanapālaṃ punarvākyaṃ sugrīvaḥ pratyabhāṣata |

and addressed the forest guardian again:

प्रीतोऽस्मि सोऽहं यद्भुक्तं वनं तैः कृतकर्मभिः ॥

prīto’smi so’haṃ yadbhuktaṃ vanaṃ taiḥ kṛtakarmabhiḥ ||

'I am pleased that those who have completed their work have enjoyed the grove.

धर्षितं मर्षणीयं च चेष्टितं कृतकर्मणाम् ।

dharṣitaṃ marṣaṇīyaṃ ca ceṣṭitaṃ kṛtakarmaṇām |

Their disturbance and conduct should be forgiven, since they have accomplished their mission.

गच्छ शीघ्रं मधुवनं संरक्षस्व त्वमेव हि ।

gaccha śīghraṃ madhuvanaṃ saṃrakṣasva tvameva hi |

Go quickly to Madhuvana and resume protecting it;

शीघ्रं प्रेषय सर्वांस्तान् हनूमत्प्रमुखान् कपीन् ॥

śīghraṃ preṣaya sarvāṃstān hanūmatpramukhān kapīn ||

send all those vanaras, led by Hanuman, here at once.

इच्छामि शीघ्रं हनुमत्प्रधानान्-

icchāmi śīghraṃ hanumatpradhānān-

I wish promptly, together with both Raghava brothers,

शाखामृगांस्तान् मृगराजदर्पान् ।

śākhāmṛgāṃstān mṛgarājadarpān |

to question those successful, lion-proud forest-dwellers,

प्रष्टुं कृतार्थान् सह राघवाभ्यां

praṣṭuṃ kṛtārthān saha rāghavābhyāṃ

with Hanuman foremost,

श्रोतुं च सीताधिगमे प्रयत्नम् ॥

śrotuṃ ca sītādhigame prayatnam ||

and hear how they found Sita.'

प्रीतिस्फीताक्षौ सम्प्रहृष्टौ कुमारौ

prītisphītākṣau samprahṛṣṭau kumārau

Seeing the two princes' eyes bright with joy,

दृष्ट्वा सिद्धार्थौ वानराणां च राजा ।

dṛṣṭvā siddhārthau vānarāṇāṃ ca rājā |

the vanara king knew their purpose had advanced.

अङ्गैः प्रहृष्टैः कार्यसिद्धिं विदित्वा

aṅgaiḥ prahṛṣṭaiḥ kāryasiddhiṃ viditvā

Thrilled in every limb, realizing success was now close at hand,

बाह्वोरासन्नामतिमात्रं ननन्द ॥

bāhvorāsannāmatimātraṃ nananda ||

he rejoiced beyond measure.